कोरोना संक्रमित बाँकेका युवाको अन्त्येष्टि गरियो, भगवानपुरस्थित दीपेन्द्र प्राविमा रहेको क्वारेण्टाइन तथा त्यस आसपासको क्षेत्र शिल
४ जेठ, नेपालगञ्ज । कोरोना भाइरस संक्रमणका कारण ज्यान गुमाएका नरैनापुर गाउँपालिकाका युवाको दाहसंस्कार गरिएको छ । बाँकेको नरैनापुर गाँउपालिकाले स्थापना गरेको क्वारेण्टाइन बस्दै आएका २५ वर्षीय युवकको आइतबार मृत्यु भएको थियो । मृतकको स्वाब परिक्षण गर्ने क्रममा कोरोना भाइरस संक्रमण देखिएपछि उच्च सतर्कताका साथ दाहसंस्कार गरिएको जिल्ला स्वास्थ्य कार्यालय बाँकेका फोकल पर्सन नरेश श्रेष्ठले जानकारी दिए ।
श्रेष्ठका अनुसार सामाजिक दुरी कायम गरेर धार्मिक परम्परा अनुसार मृतकको अन्तिम संस्कार गरिएको हो । अहिले त्यस क्षेत्रमा ब्यापक सुरक्षा सतर्कता अपनाइएको छ ।
गत वैशाख ३० गते भारतको मुम्बईबाट आएका ती युवालाई सीधै क्वारेण्टाइनमा राखिएको थियो । आइतबार बिहान ४ बजेतिर दुई पटक बान्ता गरे लगत्तै ती युवाको अचानक मृत्यु भएको श्रेष्ठले जानकारी दिए । शनिबार जिल्ला स्वास्थ्य कार्यालय बाँकेको टिमले ती युवासँगै एउटै क्वारेण्टाइनमा बसेका ३९ सहित नरैनापुर क्षेत्रबाट २६३ जनाको स्वाब संकलन गरेको थियो । ती सबै स्वाब परिक्षणको क्रममा रहेको र भोलिसम्म नतिजा आउने श्रेष्ठले बताए ।
अहिले नरैनापुर ५ मटेहियाको भगवानपुरस्थित दीपेन्द्र प्राविमा रहेको क्वारेण्टाइन तथा त्यस आसपासको क्षेत्र शिल गरिएको छ ।
प्रतिक्रिया