टिस्टा र कांगडाले बोलाएको छ

टिस्टा र कांगडाले बोलाएको छ

शान्तिमान कार्की 

नेपाली! सन्तति हो

अब घर फर्क

आफ्नै आमाको काखमा

तिमीले चुसेको

दशधारा दुधको

ऋण तिर्ने बेला भएको छ

हाम्री आमाको

अटल-अस्मितामा

वैरिले फेरि

गिद्घे नजर लाएको छ

संप्रभूताको रक्षार्थ लडने

ठिक्क बेला भएको छ।

वीर गोर्खाली हो!

अब घर फर्क,

भोकले मरिदैन

कान्ला भरि

सिस्नो पलाएको छ

गिठ्ठा र भ्याकुर

खाएर लडौला

राष्ट्रियताको रक्षार्थ लड्ने

ठिक्क बेला भएकोछ।

नेपाली वीर गोर्खाली हो!

मेची र काली मात्रै हैन

टिस्टा र कांगडाले

सुसेलेर बोलाएको छ

फेरि,वैरि संग

स्वाधिनताको लडाई लड्ने

ठिक्क बेला भएको छ

भोकले मरिदैन

ढिडो र सिस्नो खाएर लडौला,

नेपाली हो घर फर्क,

राष्ट्रियतको लडाई लड्ने,

ठिक्क बेला भएको छ।