हेलिकप्टरबाट बाढीमा फसेका नौ जनाको ४८ घण्टापछि उद्धार, बाढीले बगाउँदा एक बेपता, बालिकाको मृत्यु

हेलिकप्टरबाट बाढीमा फसेका नौ जनाको ४८ घण्टापछि उद्धार, बाढीले बगाउँदा एक बेपता, बालिकाको मृत्यु

सिरहा, २८ असार । नेपाली सेनाको हेलिकप्टरले आज साँझ कमला नदीको बाढीमा फसेका इन्जिनियरसहित नौ जना कामदारलाई ४८ घण्टापछि सकुशल उद्धार गरेको छ । 

कमला नदीमा निर्माणाधिन पुलको काममा खटिएका इन्जिनियरसहित नौ कामदारहरुलाई नेपाली सेनाको हेलिकप्टरबाट साँझ ६ ः २० बजेतिर सकुशल उद्धार गरिएको हो । 

गत बिहीवार साँझबाट बाढीको बीचमा फसेका उनीहरुले पुलमा बसेर साथमा रहेको मोबाइलबाटै आफन्त तथा जिल्लास्थित प्रहरीमा हारगुहार गर्दै ज्यान जोगाइदिन याचना गरिरहेका थिए । 

निर्माणाधीन पुलमै बसेर उद्धारको प्रतिक्षा गरिरहेका इन्जिनियरसहितका कामदारहरलाई हिजोदेखि नै नेपाली सेना, सशस्त्र प्रहरी र गोताखोरले उद्धारको प्रयास जारी राखेका थिए । तर नदीमा पानीको बहाव उच्च भएकाले सफल हुन सकेको थिएन भने राजधानीबाट पटकपटक उद्धारका लागि हेलिकप्टर उडान भए पनि मौसम प्रतिकुलताका कारण बाटोबाटै फर्किएकाले उद्धार सम्भव भएको थिएन ।

लामो प्रयास पश्चात आज साँझ सेनाको हेलिकप्टरबाट सबैलाई सकुशल उद्धार गरिएको सिरहाका प्रमुख जिल्ला अधिकारी गोपाल अधिकारीले जानकारी दिए ।
 
यस्तै अविरल वर्षासँगै कमला नदीमा आएको बाढीले बगाउँदा सिरहाको कल्याणपुर नगरपालिका ४ का कामेश्वर यादव बेपता भएको छ । 

बाढीमा बेपता भएका यादवको सुरक्षाकर्मीहरुले खोजी जारी राखेको छ । यस्तै सिरहाको मिर्चैयास्थित सडकमा जमेको पानीमा डुबेर स्थानीय ११ बर्षीया रागिनी कुमारी महतोको मृत्यु भएको छ । 

बाख्रा चराउन गएकी रागिनीको शब साँझ खाँल्डोमा डुबेको अवस्थामा फेला परेको इलाका प्रहरी कार्यालय मिर्चैयाका प्रहरी नायब उपरिक्षक सुकदेव खनालले जानकारी दिए ।