अमेरिकी प्रत्यक्ष निर्देशनमा भेनेजुएलामा भिडन्त शुरू

अमेरिकी प्रत्यक्ष निर्देशनमा भेनेजुएलामा भिडन्त शुरू

सार्वभौम देशको सार्वभौमिकतामाथि खेलबाड गर्दै आएको अमेरिकाले  भनेजुएलाका निर्वाचित राष्ट्रपति निकोलास मदुरोलाई सत्ताच्युत गराउन त्यहाँको सीमावर्ती क्षेत्रमा हिंसात्मक झडप गराउन लगाएको छ ।

अमेरिकी राष्ट्रपति डोनाल्ड ट्रम्प र उपराष्ट्रपति माइक पेन्सलगायतको गुरूयोजनामा राष्ट्रपति मदुरोलाई सत्ताच्युत गराई त्यहाँका स्वघोषित राष्ट्रपति जुआन गुआइदोसँग गुप्त मन्त्रणा गरी सीमावर्ती क्षेत्रमा उपद्रो मच्च्याइएको छ । 

उपद्रो चर्किएपछि अमेरिकाले मदुरो नेतृत्वको भेनेजुएलामा थप नाकाबन्दी लगाउने योजना बनाएको छ । टेलिफोनबाट भेनेजुएलामा अमेरिकी योजना अनुसार काम गर्न गुआइदोलाई अह्राएर द्वन्द्व चर्काउन लगाएका अमेरिकी उपराष्ट्रपति पेन्सले लिमा ग्रुपको सम्मेलनमा गुआइदोसँग प्रत्यक्ष भेटवार्ता गरी थप योजना बताउने अपेक्षा गरिएको छ । यो भेटपछि मदुरो सरकारमाथि थप नकाबन्दी लगाउन सकिने देखिएको छ ।

मदुरोलाई सत्ताच्युत गराउन सन् २०१७ मा लिमा ग्रुपको निर्माण भएको थियो । यो समूहले निर्वाचनबाट मदुरोलाई सत्ताच्युत गराउन नसक्ने देखेपछि त्यहाँ भएको निर्वाचनलाई केही प्रतिपक्षी समूहद्वारा बहिष्कार गर्न लगाएको थियो ।

गुआइदोले आफू राष्ट्रपति भएको भन्दै अमेरिकालगायतका देशसँग मानवीय सहायता अनुरूप राहतका सामान मगाउन लगाएका थिए । अमेरिकाले पठाएका सामान भेनेजुएलाको सीमासँग जोडिएको ब्राजिलको चेकनाकामा रोकिएको छ । 

गुआइदोले मगाएको राहतको सामानलाई देशभित्र प्रवेश गर्न नदिने गरी राष्ट्रपति मादुरोले रोक लगाएका केही पछि यो भिडन्त शुरू भएको अन्तर्राष्ट्रिय सञ्चार माध्यमहरूले जनाएका छन् ।

भेनेजुएलाको सेनाले राष्ट्रपति मदुरोलाई सघाइरहेकोले अमेरिकी राष्ट्रपति ट्रम्पले ज्यान प्यारो भए मदुरोको साथ छोड भनी चेतावनी दिएका थिए ।

लोकतन्त्रमा निर्वाचन मुख्य कुरो भएको मान्दै आएको अमेरिकी राष्ट्रपति ट्रम्पले भेनेजुएलामा सम्पन्न निर्वाचनको परिणामको उपेक्षा गर्दै आफूखुशी चल्ने राष्ट्रपति भेनेजुएलामा थोपर्न चाहेका हुन् ।

दक्षिण अमेरिका  र युरोपका अमेरिका पक्षीय देशहरूले प्रतिपक्षी नेता गुआइदोलाई साथ दिइरहेका छन् । कोलम्बियामा भएको कन्सर्टमा शुक्रबार अमेरिकी समर्थनमा कोलम्बियामा आयोजित सहयोग कन्सर्टमा सहभागी गुआइदो  पुगेका थिए ।

गुआइदोलाई साथ दिएको भन्दै राष्ट्रपति मादुरोले बाध्य भएर कोलम्बियासँगको कूटनीतिक सम्बन्ध तोडेको घोषणा गरे ।

ब्राजिलसँगको सीमा क्षेत्रमा शनिबार भएको भिडन्तमा केही घाइते भएको र केहीको ज्यान गएको समाचारहरूमा जनाइएको छ ।

भेनेजुएलाका पक्षमा रूस, चीन र मेक्सिको लगायतका देशहरू रहेका छन् ।