वर्षेनी बढ्दैछ घुस खाने कर्मचारीको संख्या, यो वर्ष एक सय ५४ जना सरकारी कर्मचारी पक्राउ  

वर्षेनी बढ्दैछ घुस खाने कर्मचारीको संख्या, यो वर्ष एक सय ५४ जना सरकारी कर्मचारी पक्राउ  

काठमाडौं । अख्तियार दुरुपयोग अनुसन्धान आयोगले बिभिन्न सेवाग्राहीबाट रंगेहात घुस लिइरहेका एक सय ५४ सरकारी कर्मचारीलाई पक्राउ गरेको छ । पछिल्लो वित्त वर्षको तुलनामा यो वर्ष ९२ प्रतिशतले संख्यामा वृद्धि भएको अख्तियारले जनाएको छ । 

अख्तियारले ६४ स्थानबाट ती कर्मचारी पक्राउ गरिएको जनाएको छ । पक्राउ पर्नेहरुमा सहायक स्तरका कर्मचारीदेखि सहसचिव स्तरका रहेका छन् । पक्राउ पर्नेहरुमा ९७ जना घुस, ६४ जनाले नक्कली शैक्षिक प्रमाण पत्र, १३ जनाले सरकारी सम्पत्तिको दुरुपयोग, आठ जनाले पदको दुरुपयोग, पाँच जना राजश्व चुहावट लगायतका रहेको जनाइएको छ । 

त्यसैगरी अख्तियारले यस आर्थिक वर्ष आर्थिक अनियमितता र घुस सम्बधी १९ हजार चार सय ८८ उजूरी परेको समेत जनाएको छ । जस अनुसार पाँच सय ४६ उजुरीमाथि अनुसन्धान भइरहेको र पाँच हजार एक सय ५३ उजुरीमाथि आवश्यक कारवाही प्रक्रिया अगाडि बढाइएको जनाइएको छ ।