गौतमबुद्ध अन्तर्राष्ट्रिय विमानस्थलमा २०२० मार्चबाट उडान सुरु हुँदै

गौतमबुद्ध अन्तर्राष्ट्रिय विमानस्थलमा २०२० मार्चबाट उडान सुरु हुँदै

 भैरहवास्थित गौतमबुद्ध अन्तर्राष्ट्रिय विमानस्थल सञ्चालन पूर्वको तयारीबारे नियामक निकाय नेपाल नागरिक उड्डयन प्राधिकरणले सरोकारवाला एयरलाइन्ससँग छलफल गरेको छ । गौतमबुद्ध अन्तर्राष्ट्रिय विमानस्थल सञ्चालन तयारी कार्यदलले अन्तर्राष्ट्रिय वायुसेवा प्रदायक कम्पनीका प्रमुख एवं प्रतिनिधिसँग छलफल गरेको हो ।

अन्तर्राष्ट्रिय मापदण्ड बमोजिम विमानस्थल सञ्चालन पूर्व गर्नुपर्ने तयारी र अभ्यासलाई मध्यनजर गरी कार्यदलले नेपालमा उडान भर्ने वायुसेवा प्रदायक कम्पनीका प्रतिनिधिसँग रायसुझाव लिएको कार्यदलका संयोजक प्रतापबाबु तिवारीले जानकारी दिए । त्रिभुवन अन्तर्राष्ट्रिय विमानस्थलमा अहिले ३ नेपालीसहित २८ वायुसेवा प्रदायक कम्पनीले अन्तर्राष्ट्रिय उडान भर्दै आएका छन् । छिट्टै थप ३ अन्तर्राष्ट्रिय एयरलाइन्सले उडान भर्ने तयारी गरेका छन् ।

नयाँ विमानस्थल सञ्चालन आउनुअघि एयरलाइन्सका प्रतिनिधिसँगको व्यावसायिक अभ्यासलाई मध्यनजर गरी उनीहरुको सुझाव महत्वपूर्ण हुने भएकाले छलफल गरिएको संयोजक तिवारीले बताए । सो अवसरमा प्राधिकरणका तर्फबाट विमानस्थलको भौतिक काम सकेर उपकरण जडानको अवधिभित्र सबै तयारी गरेर उडानयोग्य बनाउन एयरलाइन्सलाई आग्रह गरीएको थियो ।


विमानस्थलले उपलब्ध गराउने सुविधामा कुनै कमी आउन नदिने, विमानस्थलको सबै सेवालाई सुरक्षित, व्यवस्थित र चुस्त बनाउन प्राधिकरणले कुनै कसुर बाँकी नराख्ने प्रतिबद्धता व्यक्त गरिएको छ । जवाफमा एयरलाइन्सले विमानस्थल कहिले सञ्चालनमा आउने र के कस्ता आकर्षक सहुलियत प्याकेज हुन्छन् त्यसबारे प्राधिकरणसँग धारणा मागेका थिए ।

अन्तर्राष्ट्रिय हवाई मापदण्ड अनुरुप वर्षमा २ पटक मार्च र अक्टोबर महिनामा विमानस्थलको उडान तालिका बनाइन्छ । सोही तालिकालाई ‘मिट’ गर्नेगरी गौतमबुद्ध अन्तर्राष्ट्रिय विमानस्थल सञ्चालनमा आउनेछ । त्यो भनेको सन् २०२० को मार्च महिना हो । यो विमानस्थल मार्च महिनाभित्रै सञ्चालनमा ल्याउनेगरी काम भइरहेको छ ।
 

हाल विमानस्थलको भौतिक प्रगति ९० प्रतिशत भन्दामाथि छ । संस्कृति, पर्यटन तथा नागरिक उड्डयनमन्त्री योगेशकुमार भट्टराईले केही दिनअघि गौतमबुद्ध विमानस्थल पूर्वनिर्धारित समयअनुरुपनै सञ्चालनका लागि सरकारले आवश्यक तयारी गरिरहेको बताएका थिए । एयरलाइन्सका प्रतिनिधिले विमानस्थल सञ्चालनपूर्व ४ देखि ६ महिनाअघि नै पूर्वतयारी चाहिने बताएका थिए ।

उनीहरुले सेवा सञ्चालनका लागि आकर्षक प्याकेज कस्ता छन् भूमिस्त सेवा, क्याटरिङ, लाउन्जस्तरीय हुन्छन् कि हुँदैनन् जस्ता प्रश्न उठाएका थिए । हालको त्रिभुवन अन्तर्राष्ट्रिय विमानस्थलमा जस्तो समस्या दोहोरिन नहुने पनि उनीहरुले सुझाएका थिए । प्राधिकरणले विमानस्थलको कुनै पनि सेवामा सम्झौता नगर्ने सुरक्षालगायतलाई विशेष प्राथमिकता दिने प्रतिबद्धता जनाएको थियो ।