प्रदेश २ मा क्रस भोटिड्डको चर्चा चुलिंदै

प्रदेश २ मा क्रस भोटिड्डको चर्चा चुलिंदै

जनकपुर । प्रदेश २ राष्ट्रियसभा सदस्य पदका लागि हुने निर्वाचनमा क्रस भोटिङ्गको सम्भावना रहेको चर्चाले बजार पाएको छ । चुनाबको मिति नजिकिएसँगै प्रदेश २ मा दुबै गठबन्धनबाट क्रस भोटिङ्ग हुन सक्ने चर्चा चुलिएको हो । नेकपा–राजपा र काँग्रेस–समाजवादी दुबै गठबन्धनको तर्फबाट क्रस भोटिङ्ग हुनसक्ने भएकाले चुनाबी परिणाम फरक पर्न सक्ने सम्भावना रहेको स्थानीयहरूको बुझाइ छ । खासगरी राजपा र समाजवादीका तर्फबाट उम्मेदवार भएकाहरूको व्यक्तिगत छवि र विगतका क्रियाकलाप जस्ता कारणले पनि चुनावी परिणाममा फरक ल्याउन सक्ने आंकलन गर्ने गरिएको छ । फरकफरक गठबन्धनमा रहेका राजपा र समाजवादीका तर्फबाट क्रस भोटिङ्ग हुन सक्ने धेरैको अनुमान छ । यद्यपि बुद्धिजीवीहरूको भनाइमा यो चुनाव अन्य चुनाव भन्दा फरक भएकाले क्रस भोटिङ्गको सम्भावना कम छ । 

चुनाबी अंकगणितमा कुनै फेबदल नभए नेकपा–राजपा गठबन्धनको जीत सुनिश्चित रहेको  देखिन्छ । प्रदेश २ मा एक सय ३६ स्थानीय तह छन् । जसका प्रमुख÷उपप्रमुख गरी दुई सय ७२ तथा प्रदेश सभा सदस्य एक सय सात गरी कुल तीन सय ७९ मतदाता छन् । जसमध्ये राजपा–नेकपा गठबन्धनको प्रदेश सभातर्फ ५७ र स्थानीय तहतर्फ एक सय २७ मत गरी एक सय ८४ मत रहेको छ भने समाजवादी–काँग्रेस गठबन्धनको प्रदेश सभा तर्फ ४९ र स्थानीय तहतर्फ एक सय ३३ मत गरी एक सय ८२ मत रहेको छ । यस्तै नेपाली जनता दलको दुई र संघीय समाजवादी पार्टीको एक मत रहेको छ । क्रस भोटिङ, खरीद बिक्री लगायतका उलटफेर नभए राजपा–नेकपा गठबन्धन उम्मेदवारको जीत लगभग सुनिश्चित मानिन्छ । तर, गोप्य मतदान भएकाले जे पनि हुन सक्ने भन्नेहरूको कमी पनि छैन् । 

यस्तै चर्चाहरूका बीच दुबै गठबन्धनका नेता कार्यकर्ता तथा उम्मेदवारहरू यतिबेला मत आफ्नो पक्षमा तान्न जुटेका छन् । अघिल्लो राष्ट्रियसभा निर्वाचनमा भन्दा यो पटकको निर्वाचनमा उम्मेदवारहरूलाई ठूलै कसरत गर्नु परिरहेको छ । अन्य प्रदेशको तुलनामा प्रदेश २ को राष्ट्रियसभा निर्वाचन रोमाञ्चक र पेचिलो समेत बन्दै गएको छ । ठूठूला दलहरूबीच भएको गठबन्धका कारण प्रदेश २ मा कुन गठबन्धनले बाजी मार्ला भन्ने यतिबेला भन्न सकिने अवस्था देखिदैन । यही माघ ९ गते हुन लागेको निर्वाचनमा दुई दाजुभाइको भिडन्तले प्रदेश २ मा थप रोमाञ्चकता ल्याएको छ । प्रदेश २ मा राजपा र समाजवादी पार्टीको मजबुत उपस्थिति रहेको र ती दुबै पार्टीले छुट्टाछुट्टै गठबन्धन बनाएपछि चुनाबी परिणामको बिषयलाई लिएर यतिबेला चियापसल र पानपसलहरूमा समेत बहस र अडकलबाजी भइरहेका छन् । राजपा–नेकपाको गठबन्धले बाजी मार्छ कि समाजवादी–काँग्रेसको गठबन्धनले त्यो सबैको चासोको बिषय बनेको छ । 

नेपाल कम्युनिष्ट पार्टी (नेकपा) र राष्ट्रिय जनता पार्टी नेपाल (राजपा) को गठबन्धनको तर्फबाट राजपाले पुर्वमन्त्री मृगेन्द्र कुमार सिंह यादवलाई उम्म्ेदवार बनाएको छ भने नेपाली काँग्रेस र समाजवादी पार्टीको गठबन्धनका तर्फबाट समाजवादी पार्टीले उनको सहोदर भाइ अनिरुद्ध प्रसाद सिंह यादवलाई उम्मेदवार बनाएको छ । सप्तरीको बोदे बसाइन नगरपालिका ५ निवासी मृगेन्द्र दाजु र अनिरुद्ध भाइ हुन् । 

कतिपयले दुवै दाजुको चुनाबी प्रतिप्रस्र्धाका कारण सिंङ्गो गठबन्धनकै चुनावी परिणामलाई पनि फरक पार्न सक्ने बताइरहेका छन् भन्ने कतिपयले त्यस्तो सम्भावना नरहेको दाबी गरिरहेका छन् । त्यसैले राष्ट्रियसभा निर्वाचनमा गठबन्धनलाई मजबुत र क्रस भोटिङ हुन नदिन दुबै गठबन्धनले समयमै सतर्कता अपनाउनुपर्ने बुद्धिजीवीहरूको कथन छ । 

प्रदेशसभाको बैठक अनिश्चितकालका लागि स्थगित 

प्रदेश २ को प्रदेशसभा बैठक पुनः अन्यौलमा परेको छ । सोमवार दिउँसो बोलाइएको प्रदेशसभाको बैठक बस्दै नबसी अर्काे सूचना नहुन्जेलसम्मका लागि स्थगित भएको छ । प्रदेशसभा सचिवालयले सूचना जारी गर्दै अर्काे सूचना जारी नहुञ्जेलसम्मका लागि बैठक स्थगित गरेको छ । सचिवालयले अनिश्चिकालका लागि बैठक स्थगित गरेपछि प्रदेश २ को प्रदेशसभा बैठक पुनः अन्यौलमा परेको छ । अन्यौलमा परेको प्रदेशसभाको बैठक तत्काल सुचारु हुने सम्भावना देखिदैन । गत वर्ष  सञ्चालन भएको योजनाको भुक्तानी नपाएको भन्दै प्रदेशसभा सदस्यहरूले निरन्तर अबरुद्ध गर्दै आएको प्रदेशसभाको बैठक कसरी सुचारु गराउने ? लामो समयदेखि रोकिएको योजनाको भुक्तानी कसरी गर्ने ? लगायतका बिषय प्रदेश सरकार आफै अन्यौलमा रहेको श्रोतको भनाइ छ । निरन्तर प्रदेश सभाको बैठक अबरुद्ध भएकाले प्रदेशसभाका सदस्यहरू बिजनेश बिहीन हुनुको साथै पारित गर्नुपर्ने महत्वपूर्ण बिधेयकहरू समेत थन्किएका छन् । प्रदेश २ को नामाकरण र स्थानीय राजधानीको बिषय टुङ्गयाउन नसक्दा प्रदेश २ सरकार र संसाद नैतिक संकटमा समेत पर्दै गएको बिश्लेषकहरूको बुझाइ छ । समयबद्ध साप्ताहिकबाट