सशस्त्र संघर्ष बिरामको १३ वर्षपछि बेपत्ता पारिएका २५ सय ६ जनाको नाम सार्वजनिक

सशस्त्र संघर्ष बिरामको १३ वर्षपछि  बेपत्ता पारिएका २५ सय ६ जनाको नाम सार्वजनिक

काठमाडौं, ४ चैत । सशस्त्र द्वन्द्वमा राज्य र विद्रोही पक्षबाट बेपत्ता पारिएका २५ सय ६ जनाको नाम सार्वजनिक गरिएको छ । 

बेपत्ता पारिएका व्‍यक्तिको छानविन आयोगले सो नाम मंगलबार सार्वजनिक गरेको हो । 

द्वन्द्वकालीन मुद्दा किनारा लगाउन गठित बेपत्ता पारिएका व्यक्तिको छानबिन आयोगले १० वर्षे सशस्त्र द्वन्द्वका क्रममा राज्य र विद्रोही पक्षबाट बेपत्ता पारिएका व्यक्तिहरूको सूची सार्वजनिक गरेको हो।
सशस्त्र संघर्ष बिराम लागेको १३ वर्षपछि नामावली सार्वजनिक गरेको हो।  आयोगका अनुसार, राज्य र विद्रोही पक्षबाट बेपत्ता पारिएको भन्दै २ हजार ५ सय ६ जनाबारे उजुरी परेको छ। यीमध्ये बर्दियाबाट सबैभन्दा धेरै २ सय ५४ जनाले आफन्तको खोजखबर गरिदिन माग गर्दै आयोगमा निवेदन दिएका छन्।

बर्दियापछि दाङबाट सबैभन्दा धेरै उजुरी परेको छ। दाङबाट १ सय २८ बेपत्ताको सूचीमा छन्। त्यस्तै  रोल्पाबाट बेपत्ता पारिएका ९७ जनाबारे खोजी गरिदन निवेदन परेको आयोगले जनाएको छ। सशस्त्र द्वन्द्वको उद्गमस्थल रुकुमबाट भने ४५ जना मात्रै बेपत्ता भएको भन्दै उजुरी परेको छ। कञ्चनपुरबाट ७७, चितवनबाट ५१, गोरखा र नुवाकोटबाट समान ४०–४० जना बेपत्ता भएको उजुरी परेको छ । काठमाडौंबाट ३२ र कालीकोटबाट २४ जना बेपत्ताको सूचीमा छन्। बेपत्ता भएको भन्दै आयोगमा उजुरी दिनेको नाम भने उसले गोप्य राखेको जनाएको छ।