ठूला महल छेउमा रहेको झुपडीमा चुल्हो बल्नै छाडेपछि....
प्रेम दाहाल
सिन्धुली जिल्ला अदालत अगाडिको खोला किनार छेउमा आठ वर्षीय रामजी सानो कचौरामा खाना खाइरहेका थिए । उनीसँग अर्का दुई वर्षका वालक पनि थिए, सडक खाली थियो, लकडाउनका फाइदा उठाएरै हुनुपर्छ, उनीहरु सडकमा त्यसरी बसेर आफु र आफ्नो सानो भाइलाई रामजीले खाना खुवाइरहेका थिए ।
जिल्ला सरकारी वकिल कार्यालय, डिभिजन खानेपानी कार्यालय र जिल्ला भवन कार्यालयका ठूला र आकर्षक एवम् ठूला भवनहरु छन् । त्यहाँबाट हिड्ने जो कोही मानिसहरुको आँखा त्यही आकर्षक भवनतिर नै जान्छ । झण्डै दुई सय मिटर तल जिल्ला प्रशासन कार्यालय पनि छ । उक्त बाटो लकडाउन अगाडि झण्डै दैनिक तीन, चार सय मानिसहरु ओहोर दोहोर पनि गर्थे तर त्यहाँको सडक मुन्तिर अर्थात खोला किनारमा सानो झुपडी छ र त्यो झुपडीमा पाँच जनाको परिवार बस्छन् भन्ने कुरा कसैलाई पनि थाहै छैन ।
बिहीवार विहानै घरबाट कार्यालय जाने क्रममा खोली किनारमा छेउमा वालवालिका कचौरामा खाना खाइरहेको देखेपछि कमलामाई नगरपालिकाका प्रमुख खड्गवहादुर खत्रीले खोली किनारमा रहेको सानो घरमा पुगेर उनीहरुको अबस्थावारे बुझेका थिए ।
दम रोगले पीडित बनेका ५१ वर्षीय गोविन्दवहादुर कामीको घरमा पुगेर मेयर खत्रीले सोधीखोजी गर्न थालेपछि उनले आजबाट आफूहरु भोकै पर्ने दुखेसो पोखेका थिए । त्यसबेलासम्म गोविन्दले आफूकहाँ आउने को व्यक्ति हो भन्ने पत्तै थिएन, ‘म कमलामाई नगरपालिकाको मेयर हँु, तपाईको घरमा चुल्हो बलेको छ कि छैन भनेर हेर्न आएको हो’ हिजो बेलुका पकाएर बाँकी बसेको भात अहिले केटीकेटीले बाँडेर खाए, हामीले पकाएर खाने एक मुट्ठी पनि चामल नै छैन, गोविन्दले आफ्नो दुखेसो यसरी पोखे । उनको कुरा सुनेपछि मेयर खत्रीले झुपडीभित्र हेरे, नभन्दै कामी परिवारमा खानेकुरा केही पनि थिएन । त्यसपछि मेयर खत्री के गर्न सकिन्छ, गरौंला भन्दै त्यहाँबाट बाहिरिए ।
तीन दिन अगाडि खोली किनारमा गिट्ट कुट्ने मजदुरहरुलाई नगर सरकारले राहतको प्याकेज वितरण ग¥यो । त्यहाँ गोविन्द कामी पनि लिन गएका रहेछन् । तर उनको नगरपालिकामा स्वास्थ्य बीमा नभएकाले उनी त्यो दिन राहत पाउनबाट बञ्चित बनेका रहेछन्, त्यो कुरा हामीले आजैमात्रै थाहा पायौं, कमलामाई नगरपालिकाका सामाजिक विकास शाखाका बबिन्द्रलाल माझीले भने ।
कामी कमलामाई नगरपालिकाका स्थायी वासिन्दा नभएको र अन्यत्रबाट बसाई सरेको पनि प्रमाण नभएकाले उनी नगरपालिकाको स्वास्थ्य बीमा गर्ने कार्यक्रममा नपरेको देखिएको माझीले बताए । तर, अहिले नगरपालिकाभित्रै बसोवास गरेको र अति बिपन्न तथा गिट्टी कुटेरै आफ्ना लालावालासहित बसेको देखिएपछि उनलाई तत्कालका लागि राहत प्याकेज उपलव्ध गराइएको नगरप्रमुख खड्गवहादुर खत्रीले बताए ।
जव मेयर खत्रीको टोली कामी परिवारलाई राहतको प्याकेज लिएर उनकोमा पुग्यो, त्यसबेला गोविन्दको श्रीमती झुपडीको अगाडि झिक्रा जम्मा गरेर आगो जोर्दै थिइन् । तपाईहरु बाहिर निस्कनुस् त हामी चामल र दाल लिएर आएका छौं, मेयर खत्रीले बोलाउना साथ सडक छेउमा आएका उनीहरुको आँखाबाट खुशीले आँशु रोकिएन । आँखाबाट बलिन्द्रधारा बगाउँदै गोविन्दले भने ‘तपाई हाम्रो लागि साँच्चिकै भगवान हुनुहुँदो रहेछ ।’ समाउन सक्नुहुन्छ भन्दै नगरप्रमुख खत्रीले चामल, दाल, आलु र नुन तेलसहितको राहत प्याकेज उनको हातमा थमाउँदा, हात कामी रहेको थियो भने बोली लर्वराइरहेको थियो । नगरपालिकाले दिएको राहतको बोरा समाउन आइपुगेकी गोविन्दकी जीवन सङ्गिनीको आँखा पनि रसाइरहेका थिए ।
‘हामीले त नगरपालिकाबाट राहत नै नपाउने रहेछौ, अब हामी र साना छोराछोरी भोकभोकै बस्नु पर्ने भयो भनेर कुरा गरिरहेका थियौं, तर एक्कासी हामीले राहत पाउँदा धेरै खुशी लागेको छ’ माइली मायाँले आफ्नो खुशी यसरी व्यक्त गरिन । २१ चैत्र २०७६
प्रतिक्रिया