अस्पताल भर्ना भएको एक दिन पछि बेलायती प्रधानमन्त्री आइसीयुमा 

काठमाडौ । बेलायती प्रधानमन्त्री बोरिस जोन्सनलाई कोरोनाभाइरस संक्रमणका कारण अस्पताल भर्ना गरिएको एक दिन पछि सघन उपचार कक्ष(आइसीयु)मा पठाइएको छ ।

बेलायती प्रधानमन्त्री कार्यालय नम्बर १० डाउनिङ स्ट्रिटले प्रधानमन्त्री जोन्सनको स्वास्थ्य अवस्था बिग्रिएपछि आइसीयुमा पठाइएको जनाएको छ ।

सोमबार अपराह्न प्रधानमन्त्रीको स्वास्थ्य झन खराब हुँदै गएपछि स्वास्थ्य सल्लाहकार टोलीको सल्लाहमा उनलाई सघन उपचार कक्षमा सारिएको प्रवक्ताले बताए । 

प्रधानमन्त्री अझ चेतनामा रहेको र  उनले विदेश मन्त्री डोमिनिक राबलाई खोजेको बेला उपलब्ध रहन भनेका थिए ।

संक्रमण भएको हुन सक्ने आंशकामा १० दिन पछि उनलाई आइतबार सेन्ट थमस हस्पिटल लन्डनमा भर्ना गराइएको थियो ।

अस्पताल भर्ना भएको एक दिन पछि उनलाई आइसीयुमा सारिएको हो ।

सोमबार ५५ वर्षीय प्रधानमन्त्री जोन्सनलाई स्वास लिन कठिनाइ भएपछि अक्सिजन दिन थालिएको समाचारमा जनाइएको छ ।

गत साता प्रधानमन्त्री कार्यालयले जोन्सनको कार्यवाहकको रूपमा राब बन्ने पुष्टि गरेको थियो ।